ភ្នំពេញ៖ គ្រឿងញៀនដែលខ្ចប់ជាកញ្ចប់តែចំនួន ១០៣កញ្ចប់ ស្មើចំនួន ១០៣គីឡូក្រាម ត្រូវបានសមត្ថកិច្ចក្នុងខណ្ឌសែនសុខបានឆែកឆេររកឃើញក្នុងរថយន្តមួយគ្រឿងដែលបានជួបគ្រោះថ្នាក់ចរាចរណ៍កាលពីយប់ថ្ងៃទី០៨ ខែកក្កដា ឆ្នាំ២០២៣។
បើតាមព័ត៌មានផ្សាយដោយអធិការដ្ឋាននគរបាលខណ្ឌសែនសុខ កាលពីយប់ម៉ោងជាង១១ ថ្ងៃទី០៨ ខែកក្កដា មានរថយន្តមួយគ្រឿងម៉ាកហ៊ីយ៉ានដាយ ស្លាកលេខឡាវ ៣៧៧៧ បានបើកមកបុកឃឿនផ្ទះប្រជាជនបណ្តាលឱ្យរថយន្តរងការខូចខាតដែលមិនអាចរថយន្តបើកទៅមុខតទៅទៀតបាន។
ប្រភពដដែលបានបញ្ជាក់បន្តថា លុះដល់ម៉ោង១ជាងរំលងអាធ្រាតឈានចូលថ្ងៃទី០៩ ខែកក្កដា ឆ្នាំ២០២៣ កម្លាំងសមត្ថកិច្ចខណ្ឌសែនសុខបានស្ទួចយករថយន្តនោះមករក្សាទុកនៅអធិការដ្ឋាននគរបាលខណ្ឌសែនសុខ។ បន្ទាប់មកកម្លាំងជំនាញបានឆែកឆេរ ហើយក៏រកឃើញគ្រឿងញៀនចំនួន ១០៣គីឡូក្រាម ដែលជនល្មើសបន្លំខ្ចប់ជាកញ្ចប់តែ៕
